Madonna-i’n White House a sawi dan avangin a hla play dawn lo
Texas-a radio station pakhat chuan Women’s March-a Madonna-i’n White House a sawi dan avangin a hlate an tichhuak tawh dawn lo tih an sawi.
Madonna hian White House chu tihpuah darh vek a duh thu a sawi a, he a ṭawngkam hi nasa taka sawisel a ni zui nghal. Hemi kal zelah Texas-a radio station HITS 105 chuan Madonna hlate an radio station aṭangin an paih bo dawn tih an puang chhuak a ni.
HITS 105-a an station general manager Terry Thomas chuan, “HITS 105 aṭanga Madonna hla play tihtawp hi politics kaihhnawih vang a ni lo a, ram leh hnam hmangaihna avang zawk a ni. He zaithiamin American tihâwm lo tak a tih laia a hla lo play a, royalty lo pek hi thil dik lo a ni,” a ti.
White House tihchhiat vek a châk thu a sawi hnuah Madonna hi an sawisel nasa ta hle a, ani lah a lo ṭawng duham ve bawk. White House-a speaker ṭhin, Newt Gingrich chuan Madonna hi man tlak hial khawp a ni a ti.