Kuminah Gaga album Super Bowl-a performer-te zai man pe lo
Ama solo album a neih lohna a rei leh ta deuh a, kuminah chuan Lady Gaga hian album thar tihchhuah ngei a tum.
Forbes chanchinbuin a tarlan dan chuan Super Bowl half time show-a headliner tur hian kumin October thla hian album thar a tichhuak ang a ti. Album a tihchhuah hnu hian tour a nei nghal dawn niin a sawi bawk. Gaga tour neih tawh a hlawhtling hle a, kum 2011 khan Monster Ball Tour a nei a, hemi ṭum hian USD mtd 239 zet a lalut thei.
Forbes-in a tarlan dangah, Super Bowl half time show-a a zai dawn avang hian Gaga hian hlawh a neih phah dawn lo. Super Bowl half time show-a NFL-in mi an zaitir tawhte hi zai hlawh an lo pe ngai meuh lo. Coldplay, Beyonce Knowles, Bruno Mars, Madonna, Katy Perry leh Black Eyed Peas te pawh kha hlawh nei loa zai vek an ni.
Super Bowl half time show-a performer-te hi hlawh pe lo mah se, he show-a an zai avang hian nasa takin an music hralh a kal phah thung. Kum 2015 khan Katy Perry, Missy Elliot tih vel an zai a, Missy Elliot chauh pawh hian a hlawkpui hle. A album leh hlate heta a zai hnu hian a hma aia a let zaa tamin an hralh hnem phah. Kum 2014 khan Bruno Mars a zai a, a zai hunlai hian a album Unorthodox Jukebox chu Billboard album chart-ah top 10-a a hnung lamah a lang. A zai hnu lawkah Billboard 200-ah hian pakhatna a rawn luah leh thei nghal a ni.