Bill Gates Khawvela Trillionaire hmasa ber tura beisei

Oxfam International-in a tarlan danin Bill Gates chu khawvela trillionaire hmasa ber tura beisei a ni.

Bill Gates-a hausakna hi kum 2009 aṭang khan kum tin za zela 11 ngawtin a pun belh zel a, hetiang a nih zel chuan reiloteah trillionaire a ni thuai dawn a ni. Billionaire chu tluklehdingawn nei chin a ni mai a, trillion khat chu tluklehdingawn 1000 a ni. Kum 2006 khan Bill Gates hausakna hi USD tluklehdingawn 50 niin Oxfam chuan a tarlang a, kum 2016 kha chuan USD mtd 75 a tling tawh a ni. Oxfam hian Bill Gates-a hausakna hi a chhut a, kum 2009 aṭanga kum tin 11%-a a hausakna a pun chuan tunah hian USD tld 84 vel nei tawh tura ngaih a ni.

Amaherawhchu Bill Gates hian ṭanpuina lam thilah a sum a sên nasat avangin USD tld 84 chiah chiah hi chu a nei kher lo mai thei. Oxfam-in a chhut dan chuan khawvela mi hausa tawntaw pariatte hausakna zawng zawng leh, khawvel puma mi tluklehdingawn 3.6 te hausakna hi intluk tawk velah a ngai.

Millionaire tehkhawngah chuan mi, a hausakna belhkhawmin maktaduai a tlin chuan millionaire an ti. Hausakna tih hian a ba leh nakin a pek chhuah leh thehthang tur paiha a la neih zawng zawng sawina a ni a, chu bakah chuan bungrua leh thil hlu nei vak lo mah se, pawisa zawnga bank account emaw, saving account emaw maktaduai khat nei chin kha a ni ber. Amaherawhchu hetianga tehna hi an ram pawisa azirin an hausa chuang lo thei. Zimbabwe-a an pawisa maktaduai khat nei chu mi hausa an ni chuang lo, inflation azirte a ni. US dollar maktaduai khat nei tling chin hi kum 2015 khan khawvel pumah mi maktaduai 13 vel an awm.