Rod Steward bul­ah Cyndi Lauper

Rod Stewart chuan tour a nei dawn a, heta a hruai tur zaithiam chu 1980 chhoa hmeichhe zaithiam leh lar, hlawhtling em em Cyndi Lauper kha a ni.

Cyndi Lauper chuan Rod Stewart tour-a a kal ve thei tur hi a lawm hle. Kum 1983-a a album hmasa ber a tihchhuah hma, a la lar hma aṭang tawha a mi ngaihsan bula a tour thei tur hi intihtheih tham a ni a ti. An tour hi a lehlam zawnga thlir chuan ‘Tar Tour’ a tih theih ang! Rod Stewart hi kum 1945-a piang kha a ni a, Cyndi Lauper hi 1953-a piang a ni bawk.

Rod Stewart hi music khawvel­ah chuan mi hlawhtling a ni a, tun thlengin, upa tak ni tawh mah se, a music hralh a la kal em em zel. A record te hi khawvel pumah maktaduai 100 chuang a hralh tawh a, UK album chart-ah ringawt pawh pakhatna ni thei album paruk a nei a, a hla paruk chu UK single chart-ah pakhatna an ni tawh bawk. Cyndi Lauper hi kum 1985 khan Grammy-ah Best New Artist-a thlan a ni tawh a, kum 1989 hnu lamah ngawt pawh studio album pakua a tichhuak tawh.