Christian chart-ah Danny Gokey pakhatna

American Idol finalist, Danny Gokey chuan a hla thar hmangin Billboard Top Christian Album-ah pakhatna a rawn luah leh.

Danny Gokey hian kar hmasa khan a album, Long Play album, Rise chu a tichhuak a, he album hi kar liam ta chhung khan copy 11,000 hralhin Billboard Christian Album Chart-ah pakhatna a luah. He album hi Billboard album chart pangngai, Billboard 200-ah 32-naah a lang.

Kum 2009-a American Idol-a pathumna Danny hian kum 2014 khan Hope in Front of Me album a tichhuak a, he album hi Christian Top Album-ah pakhatna a ni tawh a, tun hi vawi hnih pakhatna a luahna a ni. Hei bakah hian kum 2015 khan Christmas Is Here album a tichhuak a, Billboard 200-ah pakuana lai a thleng pha.

A album hmasa ber, kum 2010-a a tihchhuah, country music album, My Best Days kha Billboard Top Country Album-ah pakhatna a ni tawh a, Billboard 200-ah palina lai a thleng thei. Hetianga chart-a hlawhtlinna hrang hrang a lo chan tawh avang leh, tunah a album Christian album chart-a pakhatna a han ni leh hi a lawm hle. Tuna a album Rise-ah hian hla 12 a awm a, heng zinga hla 10 phuahnaah hian a tel ve a ni.