Jt Production album thar 'Rimawi Dul' a chhuak dawn ta

'A thûk tawh' hmanga Zofate min awi mektu Jt Production chuan a album pahnihna tur 'Rimawi Dul' chu zanin hian a tlangzarh dawn.

'Rimawi Dul'-ah hian hla 10 a awm dawn a, tunlaia a hla hit chho mek, YouTube lama thlirtu maktaduai chuang nei tawh 'A thûk tawh' pawh he album-ah hian a awm dawn a, kumtir lama single-a a tihchhuah 'Lunglengin' leh single a tihchhuah hla dang pawh he album-ah hian a awm nual dawn a, tin, tunlai drummer lar ber zinga mi Ben Opa pawh he album-ah hian thawhpuiin 'Lungtiawii' tih hlaah an thawkdun a ni. Single-a tihchhuah tawh hla pali bakah hla thar kan la ngaihthlak ngai loh paruk a awm dawn a ni.

Jt-a album pahnihna tur 'Rimawi Dul' hi Er. R Lalrinkima chuan zanin dar 8-ah hian Jitters, Ngaizêl-ah a tlangzarh dawn a, Ruata Zote chu album preview-tu tur niin May 20 aṭang hian Darbu Apps lamah lei theihin a chhawp chhuak ṭan ang.

A album hmasa 'Chithlum' kha Kum 2020 June thlaah tichhuakin YouTube leh streaming platform dangah pawh Mizo hla stream hlawh ber pawl a ni a, hla hit tak 'Zan khat atan chauh' tih awmna kha niin, tuna a album tihchhuah tur pawh a hit leh viau a rinawm. Single-a a tihchhuah tawh ho a hit thei bawka ngaihthlak a manhla viau ang.

Rimawi Dul-a hla awm turte:-
1. A thûk tawh
2. Lungtiawii ft. Ben Opa
3 Ka ngai em che
4. Pialralah tal
5. Rimawl d ul
6. Ka dawihlo
7. Ka chul leh ṭhin
8. I zûn
9. Lunglengin
10. Hringnun leh rimawi