Feli Fanai a sawi tawh a takin a chantir

Nikum October thla khan hla thar a neih tur thu a sawi chhuak a, mahse a tum anga thil a kal loh avangin nikum khan kan hmu hman ta lo. Kum a thar a, Feli Fanai chuan tha thar nen a thawk a, tunah chuan a hla thar a peih leh ta a, MDM Library-ah dahin, zanin hian Zonet-ah pek chhuah a ni ang.

‘Ti ve mai la’ a hlawhtlinpui tawh a, Feli Fanai hian a hlawhtlinna lên zar zauh belhin, Theih chang se’ tih chu a tichhuak ta. He hla hi Lalnithangi Sailo phuah a ni a, music hi Kima Chhangte kutchhuak a ni. Foster Recording-ah record-in, video hi Fishtail kutchhuak a ni. Feli chuan “A hmaa ka hla ṭhenkhat ang a ni dawn lo a, a cool dawn a, lunglen changa lunglen hnem thei tur chi hla a ni,” a ti.

Feli Fanai hian tuna music video a tihchhuah bakah hian hmachhawp eng emaw zat a nei a, kuminah a hla thar ṭha tak tak hmuh a ni ngei ang. Trap music lam hawi hmachhawp a nei mek a, chu mai bakah chuan Mizote zinga hralh kal tak, hip-hop lam pawh a buaipui chho dawn. Tuna a hla tihchhuah thar hi Mizo lunglen rilrem zawng tak a ni a, tuna a hla tihchhuah leh, a hla tihchhuah leh tur, a hmachhawp te erawh music genre lamah chuan a inang viau lo.

Music video a tichhuak nual tawh a, album erawh a la ngaihtuah lo. Feli Fanai chuan album siam chu a chak viau nachung­in Mizo rilru kalhmang a la dik tawk lo deuha a hriat avangin album siam erawh a la tum lo. ‘Indil phawng phawng a awm ṭhin a, inpek loh a hrehawm a; min diltuten mi dang an lo pe zel a, chuvang chuan a hlawkna tak tak hi a awm thei ṭhin lo,” a ti.