Mars Needs Moms Movie zinga sum hloh hnem ber
Movie chhuak zawng zawng hi an hlawhtling vek bik lo a ni mai lo, sum an hloh hnem ve thei viau. Mizoram thlenga kan en nasata tel si, mahse dollar maktaduai tel hloh film hi a tam hle. Hetiang movie zingah hian kum 2011-a tihchhuah Mars Needs Moms kha sum hloh hnem ber a ni.
Mars Needs Moms hi khawvelin movie a tihchhuah tawh zinga sum hloh hnem ber a ni. He film hi kum 2011-a tihchhuah kha a ni a, Walt Disney movie a ni. Berkeley Breathed lehkhabu behchhana siam a ni a, Simon Wells channa a ni. He film siam nan hian USD mtd 170 chuang hret an seng a, chutihlaia a sum lakluh erawh a chhe hle a, USD mtd 39 chauh a ni. He film budget hrim hrim hi chu USD mtd 150 a ni a, distribution cost-ah te sum an sen belh nual a, USD mtd 170 vel an seng ta a ni. A sum hloh zawng zawng hi USD mtd 131 vel zet a tling.
John Carter kha sum hloh hnem ber dawttu a ni. Mars lam chanchin tho John Carter-ah hian Taylor Kitsch chu John Carter lemah a chang a, Lynn Collins chu a changtunu a ni. He film tihchhuah nana an senso zawng zawng chu USD mtd 307 zet a nih laiin an sum lakluh erawh a chhe hle a, USD mtd 282 a lalut. A lakluh aṭanga tax leh thil dang neuh neuha cut-in USD mtd 179 lalut ang a ni a, chuti a nih chuan a hloh zawng zawng chu USD mtd 127 lai a tling.
Retail cost zawng zawng paih hnua sum lakluh aṭanga chhuta sum lalut tlem dang leh chu The Lone Ranger kha a ni. He film hi kum 2013-a tihchhuah kha a ni a, Johnny Depp channa a ni. Film siam nana senso hrim hrim bakah distribution cost nena an sen chu USD mtd 301 lai a ni a, a sum lakluh, retail cost paih hnu chuan USD mtd 176 a ni. A hloh zawng zawng chu USD mtd 125 lai a tling a nih chu.
Jack The Giant Slayer khan USD mtd 105 lai a hloh a, palina a ni pha a, How Do You Know? chu panganaah lang phain USD mtd 104.9 a hloh. Hloh hnem dangte chu Pan, 47 Ronin, Jupiter Ascending, R.I.P.D. leh Tommorrowland te kha an ni.