Arnold-a’n a mi ngaihsan Pope a hmu

Terminator actor Arnold Schwar­zenegger chuan Vatican-ah Pope Francis chu a hmu a, a titipui a, a nuam a tiin Twitter lamah a intithei mek. Arnold hian Pope hi a ngaisang hle.

Nilaini khan Vatican-ah Ge­neral Audience buatsaih a ni a, hetah hian Arnold pawh hi a kal ve a; an thu ngaihtuah ber chu sik leh sa inthlak chungchang a ni. Arnold hi Italy-ah hian R20 tilarin a awm mek a, he pawl hi Regions of Climate Action niin, khawvel hmun hrang hranga carbon awm zat a tlem theih nan hma a la ni. General Audience-ah hian Arnold hian Pope hi hmuin thil tam tak a sawipui.

A hnuah Arnold chuan Pope nena an inhmuh chanchin hi sawiin, “Amah ngaisangtu ka ni. Catholic Kohhran hruaitu ropui tak a nih bakah Pathian thilsiam vawnghimtu ngaihsanawm a ni. Khuarel thil humhalh kawnga a hnathawh hi ropui ka ti a, hmalam hun boruak thianghlim zawk a awm theih nan amah nen thawhdun ka châk hle a ni,” a ti.