Khawvela ram 85 ten an ram nula chhe lo leh fing, zei si an rawn chhuahtir a, chung zawng zawng zingah chuan France nula, Iris Mittenaer chu nimin zing khan Miss Universe-ah thlan a ni.
Miss Universe thlanna hi Philippines khawpui, Manila-ah neih a ni a, Miss France hnenah hian nikuma Miss Universe, Pia Wurtzbach chuan crown a hlan. Miss Universe, Iris Mittenaer hi France-a Lile khuaa mi a ni a, kum 24 mi niin, dental surgery-a degree nei tura zir mek a ni.
Top 3-ah Miss France, Miss Colombia leh Miss Haiti te an awm a, an chhe loin anmahni pawh an inring tawk hle. A tawpah Miss Universe lukhum chu Miss France hnenah hian hlan a ni ta a, Miss Haiti chu First Runner Up a ni. 
Top 3-ah hian zawhna inang tlang an zawt a, chu chu, 'Hlawhchhamna an nei tawh em? An nei tawh a nih chuan chu hlawhchhamna aṭanga an zir chhuah eng eng nge' tih a ni a, an chhang ṭha lutuk lo.
Miss France hi ramri hawn chungchang, tunlai khawvela raltlan buaina kara a hlawkna an zawt a, “France-ah chuan globalisation hi a ṭha thei ang bera neih kan duh a, midangte nena inpawhna leh nun inthlengtawn hi kan duh. Nakkinah chuan ngaihdan inthlak a la awm mai thei a, tunah rih chuan kan ramrite kan hawng a ni,” a ti.
Miss Universe thlannaah hian Boyz II Men leh Flo Rida te an zai a, Steve Harvey bawkin a host leh, Nikum khan a chesual a, Miss Universe lo zawk Miss Universe-ah a puang a nih kha.
Philippines-in a thleng hi a thleng dawn tih an sawi khan an sawisel nasa hle. An ram president Duterte-a’n ruihhlo do beihpui a thlak a, mi sang chuangin an thih phah a, Philippines hian he an pawikhawihna hi Miss Universe hmang hian hliahkhuh a tum a ni an ti. Amaherawhchu Philippines-ah hian Miss thlan vel an ngaisang hle a, an ram mipui tam tak, rethei tak takte hian he hunah hi khawvel hriata hlawhtlin theihnaah an ngai.