Zualbawihi'n 'Nunrawng hmelṭha' tharthawh

Mizo Idol aṭanga Zofate'n kan hmelhriat Zualbawihi chuan hlaphuah thiam fam ta Dokâmlova hla 'Nunrawng hmelṭha' a rawn tharthawh leh a, tunah hian Music video a peihfel leh der tawh.

Zualbawihi hian he hla hi kum 2017-ah daih tawh khan a record tawh a, hun rei tak hnuah music video buatsaihin tihchhuah mai theih turin a peihfel tawh a ni. Zualbawihi chuan,"He hla hi nalh ka ti em em ṭhin a , pa Dka dam lai khan amah pawh khan sa turin min ti fo a, mahse hun lo taka min boralsan tak hnuah ka record thei ta chauh erawh ka inthiamlo hle. Amah ngei khan ngaithla ve hman se ka duh a, mahse tunah a duhthusam ang ngei a ka sa thei ta hi a lawmawm ka ti em em a, ka ngai hlu tak zet a ni," tiin a hla tihchhuah tur chungchang hi a sawi.

Cable TV lamah hla thar dah vak lo mah se Zualbawihi hian a YouTube channel lamah erawh a khat tawkin hla thar a tichhuak ve reng a, Pathian fakna hla leh hnamdang hla eng emaw zat a tichhuak tawh a ni. Zai lam chawlhsan mai a la tum loh thu pawh sawiin hla thar tihchhuah zel pawh a la tum thu a sawi bawk.

'Nunrawng hmelṭha' hi Rka 3 brother's recording studio kut chhuak a ni a, video-graphy chu Ṭhatea kut chhuak a ni thung.