Mabiaki Pachuau-in 'Lung a leng e' video thar tichhuak dawn

Mabiaki Pachuau chuan hla lungkuai êm êm mai, Mizo upa zai thlûk 'Lung a leng e' tih hla chu Music Video thar a rawn siam leh ta e.

He hla hi Blue Wave Recording lama a record niin music chu Chda siam a ni a, Lalhmingmawii Rawihte phuah a ni. Lalhmingmawii Rawihte hi MDM hla inphuahsiak kum 2018-a neihah khan Manuna leh Feli Fanai-te hla sak 'I leng dun zel ang' hmanga pahnihna dawngtu kha a ni a, Marina V Varte sak 'Aw Valmawi' pawh kha a phuah a ni bawk.

Mabiaki hian he hla hi a sa mawiin ngaithlatute pawhin ngaihnawm an tih ngei a rinawm a, video hmuhnawm tak nen a tichhuak thuai dawn a ni. AZ Entertainment chuan uluk takin video hi an siam a ni. He music video hi MDM YouTube channel lamah a dah chhuak thuai dawn a ni.