Science & Environment ; Kan galaxy lai takah Black Hole a awm!

Kan galaxy, Milky Way galaxy lai takah hian black hole hrawl tak mai a awm chu, chumi thla chu a vawi khatna atan lak niin an pho chhuak a ni.

Mithiamte chuan he black hole hi 'Sagittarius A*' tiin an sawi a, kan Ni (Sun) ai hian a let maktaduai li velin a 'mass' a tam zawk niin an sawi. A len zawngah erawh Mercury orbit ang vel a ni a, chu chu kilometre maktaduai 40-60 vel niin an chhut.

Vanneihthlak takin kan galaxy a lo lian hlauh a, kan awmna Solar System aṭanga light year 26,000 vela hlaah daih a awm a, mithiamte chuan kan tana hlauhawm thei tur chi niin an ngai lo.

'Sagittarius A*' thlalak hi Event Horizon Telescope (EHT) collaboration team chuan an pho chhuak a, black hole thlalak pho chhuah vawi hnihna niin kum 2019-a galaxy danga an hmuh 'Messier 87' hnua black hole hlimthla an pho chhuah leh hmasak ber a ni.

EHT project buaipuitu zinga mi Prof Heino Falcke chuan tuna thlalak an pho chhuak danglam bikna chu 'Kan' black hole a nihna hi a ni, a ti. "Kan bulhnai maia awm a ni a, black hole i hrechiang duh a, a hnathawh dan i hrechiang duh a nih chuan, hei ngei hian a hrilhfiah dawn che a ni," tiin a sawi.