Kristian rimawi thuthar ; Brandon Lake album thar 'Help!'

American Christian worship singer Michael Brandon Lake chuan Zirtawpni liam ta khan a studio album pathumna 'Help!' a tichhuak a, streaming platform hrang hrangah ngaihthlak theihin a awm tawh.

Grammy award hial pawh dawng tawh Brandon Lake album thar ber hi mal taka awma inhriatna, rilru hahna hrang hrang- depression, anxiety leh rilru natna chidang hrang hrang kara Pathian hnena ṭawngṭaina chungchang a ni hlawm a, album thar a tihchhuah rual hian a album title track 'Help' music video a tichhuak nghal bawk.

Lake chuan a hla thar 'Help' chungchang chu sawiin,"Kan hun tawn liam ta mai ngaihtuaha hla dik ber a ni. Pathian hi tunge a ni tih pawh hre lo tam berin he hla hi ngaithla se, a hnenah ṭanpuina dil se tih chu ka ṭawngṭaina a ni," a ti.

He album-ah hian Lake hian Judah, Amanda Cook, leh Chandler Moore-te a thawhpui a ni.

Kum 31 mi Brandon Lake hi Bethel Music leh Maverick City Music-ahte member a nih bakah Seacoast Church, Charleston, South Carolina-ah worship pastor a ni bawk.