Eurovision 2022 winner Ukraine 'Kalush Orchestra'

Eurovision Song Contest 2022 final chu Inrinni khan Turin, Italy-ah neih niin Ukraine aiawha tel 'Kalush Orchestra' chu pakhatna an ni.

Rap-folk band 'Kalush Orchestra' hi an hla 'Stefania' hmangin pakhatna an ni a, point 631 an hmu a ni. An performance tawpah 'Kalush Orchestra' member Ihor Didenchuk, Ivan Klimenko, Oleh Psiuk, Tymofii Muzychuk leh Vitalii Duzhyk-te chuan Ukraine ṭanpui turin thlirtute an ngen.

UK aiawha tel Sam Ryder chu 'Space Man' hmangin pahnihna a ni a, kum 1998 hnua Eurovision Song Contest-a UK-in result an neih ṭhat ber a ni. UK hi kum 2019 leh 2021-ah phei chuan a tawpna berah an awm hial a, kum 2009 hnuah top 10-an la lang leh lo bawk.

Spain, Sweden leh Serbia aiawha telte chu top 5-ah langin Spain pawh hian kum 1996 hnua result an neih ṭhat ber a ni.