Pentecost Fak Zai top 10 kan hre ta

Tun hnaia kohhran huang chhung zai intihsiakna ngaihven hlawh, Pentecost Fak Zai top 10 chu tihchian a ni ta - General PYD leh Literature & Publication Board-in an buatsaih, Fak Zai inelnaa top 10 hi Inrinni khan GPYD YouTube channel-ah puan a ni.

Mizoram UPC kohhran huang chhunga zaithiamte inelna hi Dinthar Kohhran Hall-ah neih a ni a, online hmanga audition round neih a nih hnuah top 20-ah thlitfim an ni a, a thiam zual 22 an thlang chhuak.

May 12 leh 13 zan khan top 20 inelna hi music track nen neih chhunzawm a ni a, zan hnih intihsiakna aṭangin a che ṭha zual 10 chu thlanchhuah an ni leh ta a ni.

Fak Zai judge Upa F. Vanlalchama chuan, "Audition round-a inthlitfim a harsa a, top 20-ah a harsa lehzual - zaithiam tak tak, hmabak nei êng tak tak hmuh tur an awm nual. Mahse, tun inelna bika a che ṭha kan thlan a ngai a, top 10 inelna hi hmuhnawm lehzual hle turah ka ngai," tiin Vanglaini a hrilh.

Upa Vanlalchama chuan, zaithiamte chu kohhran huang chhunga mi chauh ni mah se, Mizo mipuite fak zai hmanga awi thei tur zawnna a nih avangin inelna chu ngaihhlut pui turin Mizo mipuite a sawm bawk.

Pentecost Fak Zai top 10-a tlingte hian May 19, Ningani zan leh May 20, Zirtawpni zanah live music nen intihsiakna an neih chhunzawm dawn a, zan dar 7:30-ah ṭan tur niin General PYD YouTube channel-ah live-a en theih tura pekchhuah a ni ang.

Fak Zai top 10-a tling zingah, Mizo legend Rodingliana hla 'hit' puitu, Kolasib Ṭumpui tlangval Vanlalduhsaka, inelnaa tel naupang ber, kum 16 mi Rebek Vanlalnunpuii (Thingsulthliah) leh Hreichuk tlangval Shion Lalbiaknunga ten ngaihven an hlawh a, Chaltlang rawlthar Joseph Lalhruaitluanga che velin mipui lawm a hlawh viau bawk.

Zonet Bawhbel chuan Fak Zai top 10 hi a hnuah en theih turin a pe chhuak dawn bawk a, zan khatna hi May 21, Inrinni zan dar 8:00-ah a chhuak ang a, May 22, Pathianni zan dar 8:00-ah zan hnihna pekchhuah leh a ni dawn bawk a ni.

Fak Zai tawp kharna, Grand Finale hi Dawrpui Multipurpose Centre-ah May 27, Zirtawpni zan dar 8:00-ah neih tur a ni dawn a, Zonet Zawlbuk leh GPYD YouTube channel-ah live-a en theih tura pekchhuah a ni ang.