UAE President Sheikh Khalifa a thi

UAE President leh Abu Dhabi roreltu, Sheikh Khalifa bin Zayed Al Nahyan chu kar liam ta Zirtawpni khan a thi tih Ministry of Presidential Affairs chuan a puang.

Sheikh Khalifa hian kum 2004, November thla aṭang khan UAE President leh Abu Dhabi roreltu hna hi a lo thawk tawh a ni. Kum 1971-a union an nih hnua president hmasa ber, a pa Sheikh Zayed bin Sultan Al Nahyan-a'n kum 2004, November 4-a a boralsan hnuah a thlak turin thlan a ni.Kum 1948-a piang, Sheikh Khalifa hi UAE president pahnihna leh Emirate of Abu Dhabi-a roreltu 16-na a ni. An unau zinga upa ber Sheikh Zayed a ruat chhuah a ni.

President thar tur thlang nghal
Supreme Council of the United Arab Emirates chuan kar liam ta Inrinni khan an ram president ni turin Sheikh Mohamed bin Zayed Al Nahyan an thlang. Zirtawpnia kum 73 mi nia boral ta, Sheikh Khalifa Bin Zayed Al Nahyan a thlak dawn a ni.

Thlan tlin a nih hnuah, Mohamed chuan council member te'n a chunga rinna an ngah avangin a lawmzia a tarlang tih WAM chuan an sawi.

MBZ tia hriat lar, Sheikh Mohamed hi Arab ram hotu zinga thiltithei ber zinga mi a ni mek. Britain-a Royal Military Academy Sandhurst graduate hian Gulf region-a sipai ralthuam nei ṭha ber zinga mi a kaihruai dawn a ni.

Gulf hotu zinga Israel nena thawhdunna siam thei hmasa ber niin, hun rei tak chhung Arab League-in Palestinian state siam tura a pawm hma chu Israel hrek an lo remtih tawhna chu a rawn ṭhiat a ni.