Parema hla phuahte a thleng sang
Ṭhazual Fakna chart tihchhuah thar berah khan Parema tia hriat lar, R. Lalremruata hla phuah panga lai mai top 10-ah a lang a, heng hlate hi nikuma a tihchhuah album, ‘Ka vui lo Lalpa’ tiha mite a ni a, hei hian Parema hla phuah Pathianin a hmanzia leh, ‘Ka vui lo Lalpa’ album ṭhatzia a tarlang awm e. Chart-a pakhatna luahtu, Lalremsiami, Nunui hla sak ‘Ka vui lo Lalpa’ kha Parema phuah a ni a, a album tihchhuah hming put chhan a ni nghe nghe. Nikum khan he album, ‘Ka vui lo Lalpa’ tiha mi tho ‘Min chhung khat leh ṭhin’ tih chuan pakhatna a lo luah tawh bawk a, hei nen hian top 10-a lang thei hla paruk lai ‘Ka vui lo Lalpa’ tih album-ah hian a awm a ni.
Tun ṭum Ṭhazual Fakna chart-ah khan ‘Ka vui lo Lalpa’ tih hla bakah, Mawitei ft Open String hla ‘A vul zel’ tih hla, pahnihnaa awm te, Bethsy-i’n pathumna a luahpui, ‘Mifelte chauh thlang lova’ tih te, panganaa awm, TBC Zaithanpuia sak ‘Nang chauh i ni’ tih leh pasarihnaa mi, Fiona sak ‘I hming chauh’ tihte kha Parema phuah a ni a, ‘Ka vui lo Lalpa’ album-a awmte an ni.
Hetianga a hla phuah panga lai mai top 10-a a lan theih avang hian Parema a lawm hle. “Ka hla phuahte heti zat zat top 10-a a lang thei hi ka lawm a, ka tan chuan a hlu tak zet a ni. Ropuina leh chawimawina Lalpa chauhin chang zel rawh se,” a ti.
‘Ka vui lo Lalpa’ tih album hi nikum August 25 khan Vanapa Hall-ah tlangzarh a ni. He album-ah hian Hindi leh English hlate pawh a awm nghe nghe. He album hralhna aṭang hian Rs. 60,000 vel lai mai hmuh chhuah a ni tawh a, Parema chuan album hralhnate hi ṭanpuina atana pek vek a tum. Hemi hmaa album a tihchhuah ‘Ka rinchhan Lalpa’ hralhna pawh kha ṭanpuina atan a lo pe tawh bawk.