india ramah thlasik a vawt lutuk tawh lo ang

Chennai-a Centre for Climate Change and Adap­tation Research chuan kum 10 emaw chhung chu thlasik khawvawt vîn tûk ang chi kha a awm rih lo ang an ti.

Greenhouse gas ten India sik leh sa a nghawng dan uluk tak aṭanga an zirchian hnuah Centre for Climate Change and Adap­tation Research chuan thlasik vâwt lutuk awm tawh rih lo tur angin an sawi a, a bikin zan lam khaw lum dan zawng nghawng nasa zual tura an ngaih thu an sawi.

Kum 2020 chho vel thleng khian India rama khawvawh ber chawhrual (mean minimum temperature) chu 0.9 degree celsius-a a hma aia sang tura ngaih a ni a, kum 2050 bawr vel khi chuan 2.3 degree celsius-in a lum belh leh dawn a, kum 2080 vel khi chuan 3.6 degree celsius lai a kai tawh dawn a ni. Prasanta Kumar Bal chuan zan lam bik phei chu thlasik khawvawh ber kan tih angah pawh a hma aiin 2.8 - 4.7 degree celsius-in a lum tawh zawk ang a ti bawk.

Centre for Climate Change and Adaptation Research-a scientist, Prasanta Kumar Bai hian, Greenhouse gas te hian infrared radiation an hîp avangin vâwt a tinêp a, chuvang chuan greenhouse gas te hian zan lamah nghawng a nei lian lehzual a ni,” a ti. “Hetiang hi a nih avangin khaw lum ber chawhrual aiin khaw vawh lam hi a nghawng nasa zawk a, a lum lamah chuan a lum belhna a nêp hle zawk dawn a ni,” a ti.

Zirchianna an tih­chhuahah hian kum 2080 khi chuan India rama hmar thlang lam - Punjab, Haryana, Rajasthan leh Gujarat-ah nipui a zual ang a, khawlum chu tawrh a hrehawm lehzual hle dawn tih tarlan a ni. Heng hmunah te hian tun aiin March, April leh May thla hi 3.1 degree centigrade zetin a lum tawh zawk ang.