Zaithiam ṭhenkhat Grammy-ah kal an tum lo

Grammy Awards sem hunah tunlaia zaithiam hlawhtling ber berte kal lo tur an awm a, an kal loh chhan tur erawh a inang lo hlawm viau thung.

Kal lo tur langsar chu Drake hi a ni. Drake hian Europe-ah Boy Meets World Tour a neih mek avang leh, Grammy sem hunlai vel pawh hian programme a lo duan sa ṭeuh tawh avangin a kal thei dawn lo.

Justin Bieber pawh Grammy-ah hian a tel dawn lo a, a tel lohna chhan tur erawh a danglam deuh. Grammy-a category paliah ngawt a hming a lang nachungin Justin Bieber hian kal a tum lo niin TMZ chuan a tarlang a, a chhan ber chu a tunlai lo a ti. Zaithiam naupang leh ṭhangthar zawkte ai a awh zo loin, hengho tana han kal chakawm tak nia a hriat loh vang a ni ber mai. Mahse a hnu deuhah kal tur ang tak chuan a insawi leh roh. Chanchinbu ṭhenkhatin Selena Gomez leh a bialpa thar, The Weeknd te an inlan dawn avanga a hmuh hreh chhuanlam anga an tarlan avangin Justin Bieber hian tlawmah a la leh deuh pawh a ni mai thei. A hun lo thleng se a chiang ang.

Kanye West a kal dawn lo bawk a, a kal lohna chhan tur a dang leh ta thung - vun rawng inthliarna vang a ni. Kanye West chuan a hma pawhin Grammy hi lo dawng tawh mah se a kal dawn lo tih a sawi a, a chhan ber chu vun ngote nen category khata an awm kawp hlauh chuan a dawng dawn lo, vun ngoho hnenah bawk an pe zel a ti deuh a ni. Ani baka kal lo tur langsar leh chu Frank Ocean a ni a, a kal loh tur chhan erawh tarlan a ni lo.