Billboard Music Awards 2022, Olivia Rodrigo tan

Billboard Music Awards 2022 chu Pathianni khan MGM Grand Garden Arena, Las Vegas-ah sem a ni a, Sean "Diddy" Combs chuan hnehsawh taka host-in zaithiam kum 19 mi, Olivia Rodrigo chuan a award a dawng hnem ber a, award pasarih a dawng.

'Good 4 U' singer award dawng zingah hian award ngaihhlut leh ngaihven hlawh Top New Artist leh Top Female Artist of the Year-te pawh a tel bakah Top Hot 100 Artist, Top Streaming Songs Artist, Top Radio Songs Artist leh Top Billboard Global 200 Artist-te a tel a, a debut studio album 'Sour' chu Top Billboard 200 Album-ah thlan a ni bawk.

Top Artist dawngtu Drake
Billboard award category hrang hrang zingah ngaihhlut bera chhal ngam Top Artist award chu Drake-a'n a dawng. He award dawng thei zingah hian Doja Cat, Olivia Rodrigo, Taylor Swift leh The Weeknd-te pawh an tel a, mahse Canadian artist Drake hian a dawng ta a ni. Drake hian Top Male Artist, Top Rap Artist, leh Top Rap Male Artist a dawn bakah a album 'Certified Lover Boy' chu Top Rap Album-ah thlan a ni.

Kanye West-an award paruk a dawng a, Olivia tih lohah chuan a che ṭha ber. Gospel leh Christian music category-ah Ye chu a che ṭha hle a, a album 'Donda' vangin award a dawng tam leh hle. Chung zingah chuan Top Christian Artist leh Top Gospel-te pawh a tel.

Langsar zual zingah BTS
Bangtan Boys chu award dawng langsar zual zingah an tel a, Top Duo/Group, Top Song Sales Artist leh Top Selling Song award an dawng.

Taylor Swift chu Top Billboard 200 Artist-ah puan a ni a, Top Country Artist award pawh a dawng bawk a ni. The Kid LAROI leh Justin Bieber chuan an thawhdunna 'Stay' chu award panga lai an lakpui a, Doja Cat leh Taylor Swift pawhin award pali ve ve an dawng a ni.

Thil chhinchhiah tlak
Thla 16 lek liam taah khan kumin BBMA-a award dawng tam ber Olivia Rodrigo hian a single hmasa ber 'Drivers license' chu a tichhuah chuah a ni a, chuti chung chuan award dawng tam ber a ni. BBMA history-a artist thar zingah chuan Rodrigo hi che ṭha ber pawl a ni nghal a, R&B group Next chuan kum 1998 khan award pariat an dawng a, R&B star Ashanti pawhin kum 2002 khan pariat ve tho a lo dawng tawh. Heng act pahnih tih lohah hi chuan Olivia Rodrigo hi artist chhuak thar che ṭha ber a ni tihna a nih chu.

Ye hi mipa zinga award dawng tam ber a ni a, BBMA award a dawn tawh zawng zawng zat chu 17 lai a ni tawh. BBMA leaderboard-ah pasarihna a ni chiah a, Eminem nen an award dawn tawh zat a intluk chiah a ni.

Taylow Swift chuan Billboard 200 artist a vawi ngana atan a dawng leh ta a, hei hi record a ni. Bieber chu BBMA history-a top 100 artist vawi khat aia tam dawng thei a ni chiah bawk a, Luis Fonsi leh Daddy Yankee-te nen kum li liam ta khan 'Despacito' hmangin he award hi an lo dawng ho tawh.

K-pop septet BTS chuan award pathum an dawng a, kumin BBMA-a group che ṭha ber an ni.

- Kumin BBMA-ah hian The Weeknd chu nomination hmu tam ber a ni a, 17 a hmu.

- Olivia Rodrigo chu award dawng tam ber niin pasarih a dawng.

- Drake chuan kumin hian award panga lai a dawn belh leh avangin BBMA history-a award dawng tam ber a ni, BBMA 34 lai a dawng tawh!

- Mary J. Blige chuan Billboard Icon Award a dawng.

- Changemaker Award chu Maro Copeny hnenah an hlan.