Voltas Malsawm House Ṭhazual Gospel ; Cindy Lalthanpuii 'Aw Pathian' a ropui ber

Voltas Malsawm House Ṭhazual Gospel chart-ah Cindy Lalthanpuii 'Aw Pathian' chu pakhatna a ni a, Faktu 'Ka felna Lal Krista' chu pahnihna niin Pensy B. Lalthangliani 'Vut aiah parṭhi' chu pathumna a ni bawk.

KṬP General Confe-rence neih zawh tak chiaha 'Ni li a liam ta' hit-puitu Cindy Lalthanpuii chu Ṭhazual Gospel chart-ah pakhatna a ni a, thla khat vel liam taa a hla tihchhuah 'Aw Pathian' hmangin chart-ah ro a rel. He hla hi kum eng emaw zat liam taah khan a phuahtu Awpa chuan thiam takin a sa tawh ṭhin a, Cindy hian rawn thar thawh lehin ama 'style' tak maiin a rawn sa a, a sa mawi bawka, chart topper pawh a ni thuai a ni. He hla hi thla khat vel chiah YouTube-ah a la awm nachungin thlirtu nuai hnih dawn an awm der tawh. Chart hmasaah khan pahnihna a ni a, tunah chuan pakhatna rawn ni tain chart lehah pakhatna a ni dawn em tih hriat a chakawm tawh viau mai.

Gospel singer ṭha rual ṭhah intelkawmin group an din Faktu chu pahnihna an ni a, an hla 'Ka Felna chu Krista' hmangin pahnihna an ni a, pakhatna ni turin an dinhmun a ṭha sawt hle. Zaithiam chuai thei lo Pensy pawh top 3-ah rawn inhlangkai ve lehin 'Vut aiah Parṭhi' chu pathumna a nihpui mek a, ani pawh hian a dinhmun a sawh nghet chho zel a ni.

Gospel chart-ah hian artist lar tak tak an lang nual a, chung zingah chuan Lalthansangi, Melody, Grace-i leh One In Christ-te pawh an tel.