NAACP-in Rihanna 'President Award' hlan dawn

US civil rights organization- National Association for the Advancement of Colored People (NAACP) chuan tun thla Feburary 22 hian Rihanna hnenah 'President Award' an pek dawn thu an puang. 

Kum 2007-a tihchhuah Um­brella hla aṭanga mite hriat Barbadian singer Rihanna hian khawtlang tana a thawh ṭhat vangin he award hi a dawng dawn a ni. Music khawvelah chauh a hming a chher lo a, mipui vangtlang tan pawh hna a thawk ṭha hle tih sawiin, he chawimawina a dawn tur hi a phu hle tih NAACP President leh CEO nibawk Derrick Johnson chuan sawiin Rihanna hi a fak hle.

NAACP People Image Awards vawi 51-na chu California-a Pasadena hmunah neih tur a ni a, he hunah hian President Award hi Rihanna hnenah hlan a ni ang.

He hun hi Black Entertainment Television (BET) chuan live-in a pechhuak dawn a, Jay-Z, Lauryn Hill, Colin Powell, Condoleezza Rice, Jesse Jackson, Soledad O'Brien leh Muhammad Ali-te pawhin he chawimawina hi an lo dawng tawh bawk a ni.