Lalliansawma Ṭhalaite sak hlawh hla phuahtu kan chân ta
Mizo Kristian ṭhalaite kan zai chhunga dai tawh lo tur, Lalliansawma chu cancer natna avangin Nilaini zan dar 7:04 khan Grace Nursing Home, Lower Zarkawtah a lo thlir ṭhin Lal lênna Zion khawpui tual nuam panin a kal ta - nimin khan an khua Darlungah vui a ni.
Mizo Kristian ṭhalaitena kan tuipui em em hlate phuahtu, Lalliansawma hi Darlung khua a ni a, Darlung Presbyterian Kohhrana Tualchhung Upa (Kohhran Committee member) ni lai a ni a, kum 1969 aṭang khan chawlh awm loin Tualchhung Upa atan thlan tlin char char a ni a, Tualchhung Upa term hi kum thum a ni a, kum thum a liam hnuah pawh thlan tlin chhoh zel a ni.
Kum 1942 October 10 khan Kanghmun khuaah a piang a, kum 1966 khan, Dengziki nen inneiin, fa paruk an nei. Rambuai lai khawkhawmah khan Darlung-ah khawm an ni a; eizawnna lamah zirtirtu a ni a, a pension thlengin Darlung Primary School-ah Head Teacher a ni.
Lalliansawma hi hla phuah thiam tak a ni a, hla pawh ṭhahnem tak a phuah. A hla phuahte hi lehkhabuah khungkhawm a ni a, hla 109 lai dah a ni a, lehkhabua dah chhuah loh hla eng emaw zat a nei bawk.
A hla phuah zinga sak lar zualte chu Kristian Hla Bu No. 515-na ‘Lal lênna Zion khawpui tual nuam’ te, ‘Muhilte tho turin tawtawrawt a lo ri e’, ‘Chhandamna hla mawi sain’, ‘Beramno Chawimawina’, ‘Sikni Êng’, ‘Jerusalem Thar’ tih te a ni.
Nimin chhun dar 12 khan Lalliansawma hi ama hla phuah 'Lal lenna Zion khawpui tual nuam' sain thlah liam a ni a, Rev. C. Laltharzuala'n a vui.