Timberlake-a’n NSYNC a chhuahsan chhan a sawi

Kum 2000 bawr vel kha NSYNC hlawhtlin vanglai a ni a, khatihlai tak khan Justin Timberlake chuan an group hi a chhuahsan daih mai a, tun hnaiah a chhuahsan chhan a sawi chhuak leh.

Timberlake chuan a chhuahsan chhan sawiin, “Music ai mahin kan group-a tu emaw ni kha kan ngai pawimawh zawkin ka hria a, chubakah chuan music dang siam ka duhin ka inhre bawk a, chumi lam chu zawh ka ngai ta a ni,” a ti. “Stadium-ah te concert kan nei chho ta a, khangte kha a nasain a pui mah mah tawh niin ka hria. Ṭhianhoa vur hlawma invawm mai mai aṭangin vur tawlh a thleng ta ang deuh a ni ber mai,” a ti.

NSYNC hi an la titawp hauh lo a, tunah hian an che chhuak ta meuh lo chauh a ni. Lance Bass, JC Chasez, Joey Fatone leh Chris Kirkpatrick te NSYNC-ah hian an la awm reng a, an lar vanglai ber khan hun eng emawti chhung atan music an chawlhsan thu an puang a, mahse tun thlengin an la inhuikhawm leh lo.

NSYNC a chhuahsan hnuah Justin Timberlake a hlawhtling chho ta hle. Kum 2002 khan a solo album hmasa ber ‘Justified’ chu a tichhuak a, a hlawhtling nghal hle. Britney Spears nena an inngaihzawn te kha khawvela a hunlaia chanchin lian a ni a, Christina Aguilera nena an tour te, Janet Jackson nena Super Bowl half time-a an chet ropuizia te kha a hunlai titi a tling. Tun thlengin Justin Timberlake hian music khawvelah chuan hlawhtlinna a la chang chho zel a ni.