The Voice-ah Camila Cabello; Gwen Stefani pawh a kir leh dawn e

American singing reality competition television series 'The Voice'-ah Camila Cabello chu coach a ni dawn.

Fifth Harmony star kum 25 mi Camila Cabello hian Pathianni khan TikTok video kaltlangin hemi chungchang hi a sawi chiang a, he reality show-a coach- Gwen Stefani, Blake Shelton, leh John Legend-te nen 'Grace Kelly' sa hoin chutah chuan a caption-ah 'See you this fall #TheVoice' tih a ziak tel a ni.

Gwen Stefani pawhin Cabello-i'n Coach a nih dawn thu a puanzar hma lawkin The Voice-ah a kir dawn thu a lo sawi ve tawh bawk. Kum 52 mi 'No Doubt' singer ṭhin hian Zirtawpni liam ta khan hemi chungchang hi a tichiang a, a pasal Shelton-te bulah a ṭhu ve leh dawn ta a ni. Stefani hi The Voice season eng emaw zatah Coach a ni tawh ṭhin a, kum 2020-a season 19-a inlan hnu khan season hnih a chawl rih a, season 22-ah erawh a rawn inlan ve leh dawn ta tih a chiang ta e.

Season 22-a Coach pahnih- Kelly Clarkson leh Ariana Grande-te chuan show hi an chhuahsan ve leh dawn rih thung a, anni aiawh hian Camila Cabello leh Gwen Stefani hi an rawn ṭhu ve leh dawn thung a ni.