Grammy nominee zinga lalut hnem ber Adele

Keini tana tukin, anni tana Pathianni zana sem, Grammy Awards-a nomination list-ah hian zaithiam lar leh hlawhtling tak tak an lang nual a, chung zawng zawngte ai chuan Adele hian sum a lalut hnem zawk. Justin Bieber leh Rihanna te chungah a awm.

Adele hian a album hnuhnung ber 25 aṭang khan sum a hmu hnem hle a, he album hi kum 2015 chhunga album hralh hnem ber a ni a, nikum June thla thleng khan copy maktaduai 25 zet a hralh. Hei bakah ‘Adele Live’ tour a neih khan, a concert-na khawpui pakhat zel aṭangin, chawhrualin USD mtd 3.8 zel lalut anga chhut a ni.

Adele dawta sum lalut hnem leh ber chu Rihanna a ni. Rihanna hi Grammy-ah hian category pariatah a hming a lang. Rihanna hian kum khat chhungin USD mtd 75 lai mai a laluta chhut a ni. ‘Anti’ album kha a hralh ṭha hle a, hei baka a sum lakluhna dang chu Puma, Samsung leh Dior te nena an thawhhona aṭangin a ni a, chubakah chuan a tour-ah khan, a concert apiangin USD mtd 1.6 lai lalut ziah anga chhut a ni.

Justin Bieber leh Beyonce te chu sum lalut hnem leh dang an ni. Bieber hian a album Purpose aṭang te, a hla hlawhtling tak tak hralhna aṭangtea sum a lakluh hi USD mtd 56 lai a ni. Beyonce hian USD mtd 54 vel laluta ngaih a ni a, nomination list-a hming lang hnem ber ni mah se, sum lakluh tam lamah chuan a ber a kai lo.