Engtin nge Valentine’s Day i hman dawn? Mizo HS-ah thisen pek rûnpui

Association for Vo­lun­tary Blood Donation (AVBD) chuan, Mizoram State AIDS Control So­cie­ty (MSACS) leh Aizawl Civil Hospital Blood Bank-te nen ṭang rualin naktuk hian Mizo High School Hall-ah Valentine's Day pualin thisen pek rûnpui an huaihawt dawn.

Kumina Valentine’s Day Blood Donation Camp hi chawhma dar 10-ah Mizo HS Hall-ah ṭan a ni dawn a, thupui chu ‘Show Love, Give Blood’ tih a ni. Chhun dar 12-ah inkhawm buatsaih a ni ang a, tlai dar 4/5 vel thleng thisen pek theih a ni ang.

Kum dang ang bawkin Valentine’s Day puala thisen pek rûnpuiah hian Mizorama zaithiam lar ber berte an zai leh dawn a; TBC Zaithanpuia, Lalduhsaki, Israel Lalbiakrema, Ruth CVL Muanpuii, Mawi­tei Ralte, Hlimhlimi, Feli Fanai, Ruatfeli (Triau Trackx), Henry Varte, Thiam­chantira, Zorina, Arini Ralte, Loncy, Rinawmi Sailo, Cindy, FKa, BOG leh zaithiam dangte an inlan dawn a ni.

Valentine’s Day Blood Donation Camp-ah hian AVBD chuan ṭhahnem­ngai taka thisen pe turin Mizo ṭhalaite an ngen a; host leh co-host ten thisen pe apiangte hnenah rose an pe zel dawn a ni. TBC-a leh model Nunui Rualhleng te chu host an ni ang a; Duhsaki, Israel-a leh NSS volunteer-a national awardee Chawngi te co-host an ni ang.