UP inthlan thawh khatnaah vote 64.22% a tla

Uttar Pradesh assembly inthlan thawh khatna chu kar kalta Inrinni khan neih a ni a, vote nei mi vaibelchhe 2.6 aṭangin mi vaibelchhe 1.2 chuangin vote an thlak a, vote tla hi 64.22% a tling a ni.

Assembly seat 403 awmna, Uttar Pradesh assembly inthlan thawh khatna hi khawthlang lam bial, district 15 huam chhunga constituency 73-ah neih a ni a, candidate 839 an awm. Inthlan thawh khatnaa vote tla hi kum 2012 inthlan-a 61% vote tla aiin a ṭha zawk a ni. Shamli district-ah vote tla ṭha berin, 67.12% a tla a, Ghaziabad district-ah hniam berin 58.10% vote a tla a ni.

Election Commission chuan inthlan thawh khatna neih tura campaign-naah pawisa fai cheng vaibelchhe 19.56, zu litre nuai 4.44, ruihhlo cheng nuai 96.93 hu leh rangkachak leh silver Rs vaibelchhe 14 hu man a nih thu a sawi.

Inrinni-a vote thlakna bial 73-ah hian kum 2012 inthlanah khan BJP chuan seat 11 chauh ala pha a, Bahujan Samaj Party leh rorellai Samajwadi Party chuan seat 24 ve ve an la a, Rashriya Lok Dal-in seat kua leh Congress party in seat nga an la a ni. Kum 2014 Lok Sabha inthlanah khan he bial chhunga Lok Sabha seat awm 12 chu BJP-in a la vek thung.

Inthlanna felfai leh thianghlim tak a awm theih nan venhimna lam pawh khauh taka kalpui a ni a, hmun eng emaw zat­ah buaina tenau chhuak awm mah sebuaina lian tham erawh a awm hriat a ni lo. Vote thlakna hmun­ah digital leh video camera 3,888 hman a nih thu Chief Electoral Officer T Venkatesh chuan a sawi.