BSF-in sipaite pawisa note lem zirchian tir tum

Border Security Force (BSF) chuan Bangladesh ramri kaltlanga tunhnaia Rs 2,000 note lem man a nih avangin, ramri vengtu sipaite chu pawisa note lem an manchhuah theihna atana zirchianna neihpui dan a ngaihtuah mek.

BSF hotute chuan sipaiten pawisa note lem an hriathran theih nana training pek dan tur chu Reserve Bank of India (RBI) a sawipui mek a ni.

“Tun hnaiah ramri kaltlanga pawisa lem rawn lut eng emaw zat man a ni. Rs 2,000 note lem mante hian a note tak a ang hle a ni. Hei vang hian sipai duty-te’n Rs 2,000 lem an hriat zung zung theihna tura training program siam kan duh a, kan tih theih thuai pawh kan beisei a ni” tiin BSF senior official chuan a sawi.

Pawisa lem leh sum chheprelh tam lutuk tihtawpna tura nia sawia nikum November 8-a sorkar laipuiin Rs 500 leh Rs 1,000 note a tih thih hnu khan pawisa thar, Rs 2,000 tihchhuah a ni. Mahse tunhnaiah Rs 2,000 lem man a ni leh fo tawh. December leh January thla khan central security force leh police-te chuan Malda district bulah pawisa lem an man a, February 8 khan West Bengal police-te chuan Murshidabad district-ah Rs 2,000 lem 40 manin a neitu pawh an man tel nghal a ni.