Billboard 200 Rock music a la hlu reng tih lantirtu AC/DC 'Power Up'
Tunhnaiah rock music-in Billboard 200 chart-ah ro an rel khat hle. Hip-hop, pop leh EDM lam uar hun a ni bawk nen, rock music-ah pawh hard rock leh heavy metal kaihhnawih phei chu US-ah hralh a kal lo a, chuai lam a pan emaw tih mai tur a ni. Chutih lai tak chuan rock legend Australian rock band AC/DC an rawn lang a, Malcom Young-in khawvel chhuahsan tawh mah se an classic line-up nen rawn comeback-in 'Power Up' album an tlangzarh a, US leh khawvel ram eng emaw zatah album hralh kal ber an ni nghal.
AC/DC an la chuai lo, ram 18 an thunun
He thu chhiartu tam tak la pian ve hma, kum 1973-ah daih tawh khan AC/DC hi an indin tawh a, kum 47 lai a ral tawh hnua an album tlangzarh pawh ram hrang hrangah No.1 a la ni thei. Angus Young leh a thawhpuite an la tar lo a, khawvelin an la ngaisang.
November 13 khan an studio album 17-na Power Up hi tlangzarhin US-ah chuan Equivalent Album Units (EAU) 124.7 k an hmu chhuak a, album sales aṭangin 105.8 k lai hmu chhuakin streaming service-ah an hlate hian maktaduai 6.3 zet stream a hlawh bawk. US mipuite'n AC/DC an la duh reng e.
US telin, ram hrang hrang 18-ah chart No.1 an ni a, chung zingah chuan UK leh an chawr chhuahna hmun Australia pawh a tel. German leh UK-ah chuan kumin chhunga tlangzarh kara album hralh kal ber a ni nghal.
Track 12 awmna Power Up album-a track zawng zawng hi Angus Young leh Malcolm Young-te phuah vek niin wikipedia lamah chuan an tarlang a ni.
Top 3-ah album thar vek
Rapper pahnih Future leh Lil Uzi Vert-te thawhdunna album Pluto x Baby Pluto chu Billboard 200 chart-ah pahnihna a ni a, hei pawh hi November 13-a tlangzarh tho kha niin US-ah chuan EAU 101.4K a hmu chhuak a ni.
Pathumna pawh Chris Stapleton album thar 'Starting Over' a ni a, Top 3-a lang album-te hi November 13-a tlangzarh vek kha a ni a, tunṭum Billboard 200 album chart chu album tlangzarh tharin an thunun a ni ber mai.
Ariana Grande 'Positions' palina
Kar hnih lai chart No.1 a nih hnuah Ariana Grande 'Positions' chu palinaah a tlahniam ve ta a, Pop Smoke 'Shoot For The Stars Aim For The Moon' chu pangana a ni ve bawk.
Top 10-ah hian album tlangzarh thar dang pakhat la awm bawkin YoungBoy Never Broke Again 'Until I Return' chu 10-na a ni.