Kiss-in an 'biopic' tihchhuah an tum

American rock band Kiss chuan an biopic (an chanchin film a siam) tihchhuah an tum tih an manager Doc McGhee chuan a sawi.

Kiss hian nakkumah music chawlhsan an tum nia sawi a ni a, hemi hma hian an biopic hi tihchhuah hman an tum a ni. A script pawh an zawh ṭep tawh thu leh nakkum July thlaah hi chuan tihchhuah hman an tum tih McGhee chuan a sawi bawk.

An ruahman lawk angin nakkumah an biopic hi an tihchhuah hman chuan Kiss band hian Queen, Mötley Crüe leh Elton John-te hnung an zui ve dawn tihna a ni. 

Nikum January 31 aṭang an lo kapui tawh 'End of the Road World Tour' chu kumin atan a khuh hawnna Feburary 1 khan an nei a, Manchester-a SNHU Arena-ah bul an ṭan a ni. He tour-ah hi Van Halen vocalist hlui David Lee Roth chuan a ṭawiawm bawk.