One in Christ-in Ruatdiki pualin hla tichhuak dawn ta

One in Christ chuan vawiin hian an member duhtak an chan tak Lalruatdiki Chhangte pualin hla thar an tichhuak dawn.

An hla thar tihchhuah tur hi 'Nang ka hnenah I awm si' tih a ni a, Chris Ms. Dawngkima leh Steward Lalrochama te phuah a ni a, a mawi leh hle ang. Mizo Gospel Group zinga lar ber pawl OiC hian he hla hi Ruatdiki dam lai aṭanga a zir tawh a ni a, a dam huna sak ho tura an ruahman a ni. "Vanduaithlak takin a boral ta si a, a tel ve hman tak loah chuan tih amah hriatrengna atan kan hlan zui ta a ni," tiin OiC leader Alvin Lalruatfela chuan Vanglaini a hrilh.

'Nang ka hnenah I awm si' tih hi ASAFA studio-a an record a ni a, music video chu RDS kut chhuak a ni thung. Andrew Vanchhawng-in music a siam sak bawk a ni. An hla thar hi MDM lamah an register tawh a, zanin hian Zonet lamah an tichhuak dawn a, YouTube lamah pawh karleh lamah hian thlira ngaihthlak theih turin an dah chhuak hmanin a rinawm. Lalruatdiki Chhangte hi OiC Asst Leader a ni a, May 22 khan a boral. OiC chuan an hla thar chu Ruatdiki pual liau liaua an buatsaih a nih thu an sawi a ni. OiC hian a hma May thla tawpah khan Ruatdiki pual tho hian music video an tichhuak tawh bawk a, mahse khami erawh kha chu Ruatdiki dam laia music video an siam a ni thung.