Miss Mizoram 2017 ; Tun karah Photoshoot Round zo dawn Charity-a thawh duhte tan hun a la awm

Miss Mizoram 2017 chu Competition Round neih chhoh mek a ni a, Thawhṭanni aṭang khan photoshoot neih ṭan a ni a, Inrinni thleng hian photoshoot neih chhoh a ni ang.

Thawhṭanni leh Thawh­lehni te khan Photoshoot Round - Gown neih a ni a, team hnih ve ve te an inlan. Thawhṭanni khan team pa­hnihte photoshoot neihpui an ni a, Thawhlehni khan team pahnih dang an inlan leh a ni.

Vawiin hian Photoshoot Round chhunzawm leh a ni ang a, ṭum khatah team palite an inlan nghal ang. Vawiina an neih tur hi Photoshoot Round-ah pawh Street Style a ni. Zirtawpni leh Inrinni te hian Bikini Photoshoot Round neih a ni ang.

Miss Mizoram 2017-ah hian contestant te hi team palia ṭhen an ni. Team tinah hian designer leh make-up artist an awm a, heng mite hian an team-a mite ṭheuh an enkawl.

Team pakhat hi Rempuii Hmar, designer leh Nuseni, Make-up artist ten an ho a, an team hming hi Khawlkungi a ni.

Afaki Hauhnar & Barnadean Hmar designer te pa­hnih leh OPI Fanai, make-up artist ten team pakhat an enkawl a, an team hming chu Nuchhungi a ni.

Vakiria leh Jey Vee Jongte te team hi Romani Team tia koh an ni a, Teremi Ralte, designer leh Aruati Pachuau, make-up artist ten team pakhat dang an enkawl bawk a, an team hi Ropuiliani tih a ni. Team tinah hian contestant pali zel an awm.

Miss Mizoram 2017 hian SHALOM nena ṭang­kawpin HIV/AIDS veite inenkawlna lama harsatna neite nutrition support pek tumin charity event buatsaih a ni dawn. March 9 hian Charity Dinner buatsaih a ni ang a, March 10-a Grand Finale neih huna entry ticket zawng zawng pawh charity atana hlan tur a ni.

Charity-a tel duh apiang­te tan March 4 thleng ṭanpuina thawh hun hawn a ni a, a duh chuan ZONET Office-ah, office hun chhung­a pek theih reng a ni.