BTS-in hla thar an tichhuak

Korean boy band, fan ngah BTS chuan an hla thar ber chu Pathianni khan an tichhuak a, an hla thar hi ‘Spring Day’ a ni. He hla hi Wings an tihchhuah thar leh, You Never Walk Alone-a hla an dah thar pali zinga mi.

BTS hian nikum khan Wings album an tichhuak a, a hlawhtling hle a, Billboard 200 chart (mainstream chart)-ah pawh 26-naah a lang pha. He album-ah hian hla thar pali thun belh lehin, February 13, 2017 khan an tichhuak ṭha leh a, hla thar pali an thun belh zinga mi, ‘Spring Day’ hi single-in an tichhuak a ni. Wings hi K-Pop album zinga Billboard 200-a thleng sang thei ber a ni.

‘Spring Day’ hian ngaihventu a ngah nghal hle a, music video an dah chhuah pawh an dah chhuah aṭanga darkar 24 chhungin vawi maktaduai 10 an en hman.