Billboard-ah Big Sean a lian ber

Billboard 200-ah chuan Big Sean a lian ber. Kar liam ta chhung khan a album ‘I decided’ chu copy 151,000 zet hralhin, Billboard 200-ah pakhatna a ni.

Bid Sean tan tun ṭum hi pakhatna a luah ṭum hnihna a ni. Big Sean studio album pangana an hralh zawng zawng aṭanga copy 65,000 hi album pangngai, CD/DVD ang kha a ni a, a bak chu track equivalent leh streaming equivalent te a ni. Kum 2015-a ‘Dark Sky Paradise’ a tihchhuah kha pakhatnaah a lo awm tawh a, kha album kha kar khat chhungin copy 173,000 hralh a ni a, tuna a album thar ai chuan hralh a kal zawk. ‘I decided’ hian a album hmasa tluk lo mah se, a hlawhtling viau tho tih a lang a, heti hian top 5-a lang thei album panga a nei ta.

Super Bowl chu Lady Gaga hian a hlawkpui hle a, a album Joanne chu pahnihnaah a rawn lang leh zawk mai. Kar liam ta chhung khan copy 74,000 hralh a ni a, a hmaa a hralh zat

aṭanga tehin, tunah hian za zelah 818% ngawtin a hralh a pung. Chu mai bakah a album hmasa ber, ‘The Fame’ pawh kha top 10-ah a rawn lang chhuak leh thei a, paruknaah awmin, kar liam ta chhung khan 38,000 lai a hralh. Born This Way album pawh 25-naah a lang a, copy 17,000 a hralh a, ARTPOP khan 174-naah kai chhoin, copy 5,000 a hralh.

A hmaa pakhatna, Migos album ‘Culture’ chu pathumnaah a chhuk thla a, copy 68,000 hralh a ni. Reba McEntire chuan a album “Sing It Now: Songs of Faith & Hope” chu copy 54,000 hralhin palinaah a kai chho a, The Weeknd album ‘Starboy’ chu copy 47,000 hralhin pangana a ni.