i20 thar Aizawlah tlangzarh

Hyundai Company car chhuak thar, i20 thar chu nimin khan CK Hyundai Showroom-ah CK Hyundai Aizawl CEO K Biakthianghlima'n a khuh hawng.

K Biakthianghlima chuan CK Hyundai chu kum 2014 aṭanga an ṭan thu sawiin Aizawl mai bakah thlawhtheihnaa zinchhuak turte tan Lengpui Airport-ah Customer Care & Service Centre hawn a nih dawn thu a sawi a, Lunglei lamah Southern Regional Dealership buatsaih mek a nih bakah Champhaiah pawh 2 Bay lift Service Centre an buatsaih mek tih a sawi. 

CK Hyundai hian Chiteah service centre an nei mek a, an duh­thusam anga an peihfel hunah phei chuan  Eastern India Zone-a servicing centre lian ber a nih dawn thu a sawi bawk.

i20 thar chanchin sawitu (Tech­nical reviewer) Lalbiakdika Chhangte chuan New i20 hi kum 2020 chhunga Hyundai Car siam chhuah thar palina a ni a, he car tharah hian engine chi thum - 1.0L  Turbo 3-Cylinder, 1.5L 4 Cylinder leh 1.2L 4 Cylinder-te awmin Transmission chi li -Manual Transmission, Intelligent Variable Transmission, Dual Clutch Transmission leh Intelligent Manual Transmission te a awm a ni, a ti.

i20 thar hi chi hrang hrang awmin a man hniam ber Magna chu Rs.6,84,500 man a nih laiin a man to ber 1.0L Turbo VTVT Asta O DTC DT chu Rs.11,37,900 man a ni thung.