Fiona hla thar 'Mana Lei' Mizo film thar tur OST a ni nghal dawn

Fiona Pachuau chuan hla thar 'Mana Lei' a tichhuak dawn.

Hmanni lawka khiangawi ta Fiona hian pasal a neih hnua a music video hmasa ber tur 'Mana Lei' chu a peihfel ta a, hun rei lote hnuah Zonet lamah leh YouTube lamah en theihin a awm dawn a ni.

'Mana Lei' hi Dr. Albert Vanlalliantluanga phuah a ni a, videography chu Remruata, Bilywaif niin music chu Lal K Sailo kut chhuak a ni thung a, a hla mai bakah music video leh music pawhin belhchian a dawl dawn. Recording erawh Asafa recording Studio lamah a ti thung.

Fiona music video thar hi a hmuh a nuam dawn a, mit a tlai dawn tih a chiang. Thla sarih vel lai an buaipui hnuah an tichhuak dawn a, Bilywaif hi Michelle Varte 'Chawngtinleri' music video siamtu tho kha a ni bawk a, a kut chhuak a theuneu lo ang tih a chiang. Projek_liantluang, owner Dr.Albert Vanlalliantluanga hnuaia siam niin JH Lallungmuana chuan production manager a ni a, Isua hunlaia awm ve ang takin Fiona-i hi an lantir a ni.

Faktu band member ṭhenkhatin Fiona-i hi an pui bawk a, Angaihtei leh Kraws-i-te pawhin backing vocals lamah an pui bawk.

Mizo Christian Love story movie thar tihchhuah tur a awm a, tunah hian hmalak mek a ni. Chu film hming pawh chu 'Mana Lei' tih a ni dawn tho a, he hla hi OST-ah an hmang nghal dawn bawk. Chu film-ah chuan Mizo film star larte pawh kan hmu dawn a nih hmel.