Fak Zai top 10 zaninah ṭan dawn

Pentecost Fak Zai pawh a hmawr bawk a hnai ta zel a, zanin dar 7:30 aṭang hian top 10 intihsiakna neih ṭan a ni leh tawh dawn - live music hmangin inelna hi neih a ni dawn a, General PYD YouTube channel-ah live-a en theih a ni ang.

Dinthar Kohhran Hall-a neih inelnaah hian a zan khatnaah mi panga an inlan phawt ang a, naktuk zan dar 7:30-ah a zan hnihna neih tur niin, mi panga an inlan leh dawn a ni.

Fak Zai judge Ramher-liani chuan, "Zaithiam tak tak aṭangin mi 10-ah kan thlifim chho a ni a, heta ṭanga inthlitfim leh chu hna hautak tak a ni dawn a ni - en pawh a manhla leh khawp ang," tiin Vanglaini a hrilh a, Mizo mipui awi thei tur zaithiam ṭha tak an awm dawna a hriat thu a sawi bawk.

Pentecost Fak Zai top 10 hi GPYD YouTube channel-ah live-a pekchhuah a nih bakah, Zonet Bawhbel chuan a pe chhuak ve leh dawn bawk a, zan khatna hi May 21, Inrinni zan dar 8:00-ah a chhuak ang a, May 22, Pathianni zan dar 8:00-ah zan hnihna pekchhuah leh a ni dawn bawk a ni.

Top 10 aṭang hian Grand Finale-a inlan tur thlanchhuah tur a ni tawh dawn a, Grand Finale hi Dawrpui Multipurpose Centre-ah May 27, Zirtawpni zan dar 8:00-ah neih tur a ni ang - Zonet Zawlbuk leh GPYD YouTube channel-ah live-a en theih tura pekchhuah a ni ang.

Pentecost Fak zai hi General PYD Literature Committee leh Literature & Publication Board ṭang dunin an buatsaih a ni.

Pentecost Fak Zai top 10
Zanin inlan turte
Joseph Lalhruaitluanga Chaltlang
Malsawmdawngliani Bungkawn
Shion Lalbiaknunga Ramthar Hreichuk
Lalhmingmawii Armed Veng South
Rebek Vanlalnunpuii Thingsulthliah

May 20 Zirtawpni zan inlan turte
K. Lalnunpuii Bungkawn
Lalbiakfela Bethlehem Vengthlang
C. Lalhriatkimi Chaltlang
Michael CR Lalpianfela Bungkawn
Vanlalduhsaka Ṭumpui Kolasib