'Tron: Legacy' Sequel an buaipui ṭan

'Tron: Legacy' sequel chu siam a ni dawn tih hun eng emaw chen aṭanga sawilana a awm hnuah tunah chuan an buaipui ṭan ta.

Tlangzarh a nih aṭanga kum 10 lai a liam hnuah a chhunzawmna tur siam ṭan a ni ta a, 'Tron' hmuhnawm titute tan chuan thu lawmawm tak a ni ngei ang. Walt Disney Studio-a  President Of Music & Sound­tracks Mitchell Leib chuan 'Tron :Legacy' chhunzawmna an siam ṭan thu hi a sawi chiang tawh a, script pawh an zo tawh a, a danglam dawn hle tih a sawi.

"Tron 3 kan buaipui ṭan mek a, kum eng emaw zat liam taah kha chuan siam ṭan ila a la hun lo mai thei, mahse tun hi buaipui ṭan hun tak zawk niin ka hria," tiin a sawi a ni. Hemi chungchang bak hi thuchiang dang sawi tur a la nei lo a, tlangzarh hun tur, director leh project buaipuitu dang a la tarlang lo bawk. Kum 1982-ah daih tawh khan 'Tron' tlangzarh a ni a, kum tam tak a liam hnu kum 2010 khan a chhunzawmna 'Tron: Legacy' chu siam lehin tunah hian 'Tron 3' chu an buaipui ṭan leh chauh a ni.