Grace-i'n video thar siam tumin a puanven a sawi chhing mek

Grace-i hian nikum Good Friday puala Ṭhutmuan Rimawia a sak ‘Krawsah chuan’ tih chu music video-a siam turin a buaipui mek a, recording a ti fel tawh a, hmabak chu video shooting chauh a ni tawh. March thla, chawlhkar hmasa lamah video shooting a ti ang a, March thla chhung ngei hian he music video hi a tichhuak ang.

‘Krawsah chuan’ tih hla hi Hillsong United hla a ni a, Robert-a lehlin a ni. Good Friday pual deuha tihchhuah a tum a, a inbuatsaih chho mek. School chawlh laia shooting tih a tum a, March thla hunawl a nghak rih a ni.

Grace-i hi training avang te, exam hma­chhawn neuh neuh a neih avangtein nikum chhung khan music thar a tichhuak lo. Tunah chuan zirtirtuin a thawk tawh a, music lam pawh a hawi hman deuh tawh dawn. “Kum­in chuan ka hman ve ta deuh a, hma ka la chho ang. Tuna mi bakah hian pakhat dang chu music video-a tihchhuah ka tum; hla ka nei nual tawh a, kumin chhungin pahnih tal music video-a tihchhuah ka tum,” a ti.

Zirtirtu a ni tawh a, primary school-ah a thawk a, tawnhriat pawh danglam deuh deuh a nei chho. “Zirtirtu nih chu a nuam a, teaching line hi ka tuina a ni ve hrim hrim. School-a thawh chu a hlimawm a, a chang chuan ninawm tih chang ka nei a, a chang chuan a nuam hle,” a ti.