Solange Knowles-i’n Grammy hotute a sawisel

Grammy Awards sem takah khan Adele chuan Album of the Year a dawng a; mingoin he award a dawn avang hian Beyonce laizawn, Solange Knowles chuan Grammy hotute a sawisel.

Solange Knowles chuan, “Tun kum 20 chhung hian Album of the Year hi midum pahnih chauhin an la dawng,” tia sawiin, a midumpuite a sawina ni âwm takin, “Nangmahniin committee siam ula, nangmahniin hetiang hi siam ve ula, i ṭhiante hnenah award pein, nangmah ngei pawh i inpe thei ang,” tiin, a midumpuite chu inchawimawi tawn turin a fuih.

Hetianga a laizawnnuin a sawi tih a hriat ve leh Beyonce chuan a laizawnnu, Solange a sawisel ve thung. Khawthlang chanchinbuten an sawi danin Beyonce hi a laizawn thusawiah a lawm lo hle a, Album of the Year pawh kha Adele chuan a phu hlein a hria, niin an tarlang.

Adele-i’n Album of the Year a dawn khan a award dawn chu Beyonce-i tan a hlan thu a sawi a, a zaithiam duh ber a ni tih a sawi bawk. “He award hi pawm thei niin ka inhre lo a, dawng thei tur hian kei chu ka tê lutuk; ka lawm a, ka hlim tak zet a ni. Zaithiam ka duh ber mai chu Beyonce hi a ni a, Lemonade album pawh kha ka tan chuan album ropui leh chhin­chhiahtlak a ni,” a ti.