Harry Cornick A rinna mil zelin ke a pên

American Idol-a judge, Jennifer Lopez te, Keith Urban leh Nicki Minaj te ṭhutpui ṭhin, American Idol tihtawp a nih thlenga judge panel-a ṭhu, Harry Cornick Jr.

chuan eizawnnaa ke a pên a, hma a lak chhoh reng reng hi Pathian a rinna mil zela a ruahman thu a sawi a, a rinna piah baka thil tih ngai a awm chuan a ti lo mai ṭhin.

Harry Cornick Jr. hian eizawnna kawnga ke a pên reng reng, thu­tlukna a siam reng reng hi Pathiana innghat tlat a ni a ti. Gospel Herald-in a kawmnaah a rinna chungchang hi sawi chhuakin, "Eizawnnaa thu­tlukna ka siam reng reng ka rinna hrulah zel ka siam...thutlukna ka siam reng rengin ka chhia leh ṭha hriatna kalh lo, mut titui tur zawng hlirin thutlukna ka siam," a ti a, a hnua inchhir lehna tur ang chiah chuan thutlukna a siam ngai lo.

Miin an ṭawngṭaipui a nih pawhin ama ṭhatna tur ngawr ngawr­a dil lo turin a ngen a, "Ka tana an ṭawng­ṭai a nih pawhin ka telna show thlirtuten rilru hahdamna leh chawlhna an neih theih nana dil turin ka duh a ni," a ti. American Idol tihtawp a nih hnuah Cornick hian 'Harry' tih talk show a kalpui.

Cornick hi US mipa zaithiamte zingah pawh hlawhtling ber pawla chhiar a ni. A album hrang hrangte hi khawvel pumah copy maktaduai 28 chuang zet a hralh tawh a, RIAA-in US mipa zaithiam, an hla leh album hralh thei ber ber 60 thlan chhuah zingah pawh a tel. Grammy Awards pawh pathum lai a la tawh a, Emmy Awards pawh pahnih a hawn tawh.