NYU-in Taylor Swift hnenah Honorary Doctorate Degree

"Ka tihsualte khan ka nuna ṭhil ṭha ber min hruai thleng" - Taylor Swift

Zaithiam avanga Grammy award 11 lai dawng tawhtu, Billboard-in 'Woman of the 2010s Decade'-a a puan, American Music Awards-a 'Artist of the 2010s Decade' award hial pawh dawng tawhtu, pop icon Taylor Swift chu Nilaini khan Yankee Stadium-ah New York University chuan Honorary Doctorate Degree a hlan.

Kum 32 lai ni ve tawh, kum 17 vel a nih aṭanga khawvelin a hmelhriat tawh, vawiin thlenga top artist la ni reng thei Taylor Swift hi NYU hian an Spring 2022 graduation ceremony-ah Doctorate Degree hi an pe a, minute 20 vel lai thu sawiin, a thusawi tam takin ngaihven a hlawh zui hle.

Swift chuan zirlai graduate hlim sang chuang hmaah thu sawiin zirlaite pawhin an lawm hle a, thu ṭha tak tak a sawi chu media hrang hrangin an ngaihven zui a, news site ṭhenkhat phei chuan a thusawi pumpui an tarlang chuai chuai hial a ni.

A thusawi ngaithlatute a fuihna thu a mawi a, tunah chuan Dr. Taylor Swift ti pawhin a sawi theih tawh ang chu!

A thusawi ṭhenkhat chu...
Taylor Swift chuan college pangngai a experience ve loh thu sawiin, "Tenth grade ka nih thlengin public high school-ah ka kal a, a bak ka zirna chu inah leh airport terminal aṭangin ka zo a ni. Chumi zawhah chuan radio tour neiin ka kal a, nuam tak angin lang mah se, a nihna takah chuan car hawh chawp leh motel-ahte hun ka hmang a ni...

"Ka naupan lai chuan college ka kal ngei ka ring ṭhin a, ka freshmen dorm-a ka poster tar turte ka ngaihtuah ṭhin," tia sawiin a college nun suangtuahna chu 'Love Story' music video-ah pawh khan hmuh tur a awm thu a sawi.

"Tlawmna nena nun zir rawh u. Tlawm tum lo viau ṭhin mah ula, i nun i thlirlet hunah i hmu tho ang. Mihring nunah tlawmna hi pumpelh theih a ni lo" tia sawiin, a hla phuahna chungchangah leh a nunah tihsual a ngaih ve zia thute a sawi bawk. "Ka tihsualte khan ka nuna ṭhil ṭha ber min hruai thleng," tia sawi hialin, tihsuala hrehawm tih chu mihring nun peng pakhat a ni, a ti.