Chance The Rapper leh Coloring Book

Grammy Awards-ah khan Best Rap Album dawngtu chu Chance The Rapper a ni a, a dawnna album chu Coloring Book a ni. He album hi lei pangngaia lei theih tura zawrh a ni lo a, streaming-only album a ni. Streaming-only album zinga Grammy-a nominate awm chhun leh dawng thei awm chhun a ni.

Chance The Rapper hi Kristian a ni a, a album, Grammy a dawnna, a mixtape Coloring Book hi ama sawi dan takah ‘Christian theme’ album a ni. He album hmanga hlawhtlinna a chan hma hian Kristian a ni tawh a, a album hi Gospel album a ni lo a, amaherawhchu Kristian a nih avanga lang Kristian zawk a ni a ti.

A hming tak chu Chancelor Johnathan Bennett a ni a, kum 1993 April 6 khan a piang. Kum 2015 khan Bonaroo Music Festival-ah hit deuhin a lo che tawh a, nikuma Kanye West-a album, The Life of Pablo-a Ultralight Beam kha Kanye nena an phuah a ni.

Coloring Book hi Chance The Rapper-a mixtape pathumna a ni a, nikum May 13-a a tihchhuah kha a ni. Internet streaming tur chauha Apple Music kaltlanga a tihchhuah a ni. Chawlhkar khat chhungin a album-a hlate hi maktaduai 57.3 zet stream a ni a, chu chu streaming equivalent album chuan copy 38,000 tlukpui a ni; Billboard 200-ah pariatnaah a lang a, Streaming-only album zinga Billboard 200-a lang thei awm chhun a ni.

Nikum January 31 khan Twitter-ah, “Vawiin hi ka nun hlui mual liam ni a ni a, zial ka zuk tawp ni a ni. Ṭanpuina zawngin biak in ka pan a, mi tichaktu Krista avang chuan tih theih loh engmah a awm si lo,” tiin a tweet-a, chu chu a vawng zui zel a, May thlaa album a tihchhuah Coloring Book-ah pawh a lang. A album chungchanga an kawmnaah Chance chuan, “Gospel thar emaw, gospel emaw lem chang tura pen chhuaka ka siam a ni lo a, Kristian ka nihna anga keimah aṭanga chhuak music a ni. A hmain Kristian ka nihna angin music pawh ka siam tur a ni tiin ka lo ngaihtuah tawh a ni,” a ti.