Fak Zai top 10 inelna zo

Pentecost Fak Zai top 10 inelna chu nizan khan neih zawh a ni ta a, vawiin chawhnu dar 2:00 hian General PYD YouTube channel-ah Grand Finale-a inlan turte result puanchhuahna neih a ni ang.

Dinthar Kohhran Hall-a neih inelna hi live music hmanga neih a ni a, GPYD YouTube channel-a live a nih bakah Zonet Bawhbel leh Zawlbukah pekchhuah leh a ni ṭhin.

Top 10 intihsiak, zan khatna hi May 21, Inrinni zan dar 8:00-ah Zonet Bawhbelah chhuah tur a ni ang a, zan hnihna hi May 22, Pathianni zan dar 8:00-ah Bawhbelah bawk a chhuak leh ang.

Pentecost Fak Zai Grand Finale hi Dawrpui Multipurpose Centre-ah May 27, Zirtawpni zan dar 8:00-ah neih tur a ni a, mi panga an inel ang. Zonet Zawlbuk leh Zonet YouTube channelah live-a en theih tura pekchhuah a ni dawn a ni. 

Fak zai hi General PYD Literature Committee leh Literature & Publication Board ṭang dunin an buatsaih a ni.