Liam Neeson-a’n kohhran thliar lo school ngai pawimawh

Irish chhulchhuak Liam Neeson chuan a chawrchhuahna rama sakhaw behchhan zirna ina kohhran pawl hrang anga thil kalpui ṭhin chu ṭha a ti lo a, kohhran pawl thliar lo school tilar turin hma a la.

Northern Ireland-ah hian kohhran inkara buaina hi a ril hle a, Roman Catholic naupang chu Roman Catholic-in school a siamah te an kal a, Protestant naupangte chu Protestant kohhranten school an siamah an kal. Northern Ireland-a school naupang zaa 90 te chu Roman Catholic emaw Protestant school-ah emaw an kal a ni.

Hetianga sakhuana thila inthliarna emaw, awmho leh thawhho a la harsa hi Liam Neeson chuan a vei hle a, chuvang chuan kohhran pawl hrang hrang naupang, Roman Catholic leh Protestant pawh thliar lohna school atan hma a la. “Mi tam tak chuan kan khawtlang leh ramin hma a sawn zel theih nan naupangte zirna hmun khata zirtir hi ṭha an ti a ni,” a ti. Catholic leh Protestant school te hian an zirna inah te kohhran pawl dang tan pawh admission tih theih a ni tih an tarlang ṭhin tho nachungin an inkal pawlh mang lo hle.

Northern Ireland-ah hian kohhran pawl hian politics-ah pawh hnuhma a nei lian hle. Ireland aṭangin kum 1922-a siam a ni. Protestant kohhrante chuan United Kingdom-a awm an duh a, United Kingdom of Great Britain and Northern Ireland din a nih theih nana sulsutu pawimawh an ni (lam tawiah United Kingdom). Catholic lamte hi chuan Ireland pangngai nena inthlunzawm an duh thung. Kohhran pawl behchhana ram zawm duh lam neih avang hian hunrei tak chu ralthuam cheleka inbeihna a thleng ṭhin a, kum 1998 Good Friday ni khan inremna an siam thei chauh a ni.