Glastonbury-ah Roger Waters Pink Floyd inzawmkhawm leh a rinawm loh

Glastonbury Festival neih tur atan zaithiamte an be fel leh ṭan mek tawh a, heta lang tur, headliner tur zingah Pink Floyd-a mi Roger Water pawh a tel a, mahse a band erawh an tel dawn lo.

Pink Floyd-a mi tho, Nick Mason pawh Glastonbury festival-ah hian a che dawn a, Walters nen ni loin, a hrangin a ni ang.

Roger Waters hian kum 1985 khan Pink Floyd a chhuahsan a, amahe­rawh­chu kum 2005 aṭang khan David Gilmour te, Nick te nen hian an inhrualho leh a ni. Waters hian Pink Floyd hming anga he festival-a chet lam hi a rilruin a hawi lem lo a, solo artist anga chet a thlang zawk daih. Pink Floyd anga chet a harsatna tur nia Walters leh Nick tena an sawi chu David Gilmour hi an band aṭanga chawl ang reng deuh, chawlh chiah si lo, lai laklawh deuha a awm vang a ni an ti.

Roger chuan, “Ka hriat hnuhnun berah chuan David-a hian music a chawlh­san,“ a ti a, Nick chuan, “A chawl tawh tih thu ka dawng a, a hnu lawkah a chawl leh lo angin a awm leh bawk sia,” a ti.

Kum 2008-a an keyboardist Rick Wright a thih hnu aṭang khan thil an tiho hlei thei tawh lo. Inzawm­khawm leh chungchang Waters-a hi an zawt a, “Mi hian he mi thu hi min zawt reng mai a, a nin pawh ka ning zozai ta deuh,” a ti; inzawmkhawm leh lam a lang tawh chiah lo ang. Roger Waters hi kum 73 mi a ni tawh a, Nick pawh kum 70 mi a ni tawh.