Fak Zai hmawr bawk a hnai ta

Pentecost Fak Zai Grand Finale-a inlan tur chu Inrinni khan tihchian a ni ta a, top 10 inelna aṭanga tling mi pangaten inelna an hmachhawn dawn - Grand Finale hi May 27, Zirtawpni zanah neih tur a ni ang.

Fak Zai inelna hi April thla tawp lam aṭang khan neih ṭan a ni a, audition round aṭangin a ti ṭha zual 20 thlanchhuah a ni a, Dinthar Kohhran Hall-ah music track nen inelna an nei.

Top 20 aṭang hian top 10-ah thlitfim leh a ni a, live music nen inelna kalpui niin a ti ṭha zual pangate chu Grand Finale-ah an inel leh dawn ta a ni.

Pentecost Fak Zai chief judge Rev. Dr. Ngurthanpara Sailo chuan, "Kan zaithiamteah round tin aṭangin hmasawnna hmuh tur a awm a, chu chuan min tilawm a ni. He Fak Zai buatsaih chhan langsar zingah Pentecost literature hmasawnna a tel a, he intihsiak hian kan zaithiamte bakah hla phuah mite nasa takin a cho phur niin ka hria a ni," tiin Vanglaini a hrilh.

Rev. Dr. Ngurthanpara Sailo chuan sawi zawmin, "Top 20 aṭang kha chuan an zaithiam em em vek tawh a, kan inthlitfim zel hnuah mi panga kan thlang chhuak a ni a, anni ho zingah hian pakhatna an awm a ṭul dawn - lawmman dawng pha lote pawh hi zaia Mizoram mipui min awi turin an thiam tawk tawh," a ti a, Grand Finale-ah thutlukna siam a harsa dawn tih a sawi.

Fak Zai Grand Finale hi Dawrpui Multipurpose Centre-ah neih tur a ni a, May 27, Zirtawpni zan dar 8:00-ah ṭan a ni ang a, Zonet Zawlbuk leh Zonet YouTube channel-ah live-a en theih tura pekchhuah a ni dawn a ni.

Pentecost Fak Zai hi Mizoram UPC kohhran huang chhunga zaithiamte inelna a ni a, General PYD Literature Committee leh Literature & Publication Board-in an buatsaih niin a vawi khatna a ni.

Fak Zai judge zinga mi Upa F. Vanlalchama chuan, "Zai intihsiak buatsaih hi a hautakin, tha leh zung, sum leh pai tam tak sen a ngai. Mahse, talent pholan loh, hup beh mai tur tam tak pholanin a awm a, chungte ngaihtuah chuan kan insenna leh hahna te hi a man em em a ni," a ti a, Fak Zai inelna ngaihhlut pui zel turin mipui a sawm bawk.