DARBU vaw ri rawh le!

Mizo rimawi khawvel tana application ṭangkai tak ni tura beisei Darbu apps chu Zirtawpni zanah khan Regency Hotel conference hall-ah tlangzarh a ni.

Darbu hi 'Music & Audio application' niin a thlawna Mizo hla ngaihthlakna a ni a, Mizo zaithiamte album thar hmun danga awm lo lei theihna leh zaithiamte 'merchandise' zawrh chhuah theihna a ni a, tunah hian App Store leh Google Play-ah te iOS leh Android hmangte tan download turin a awm ve ve tawh. Tun dinhmunah artist 264 aṭangin Mizo hla 1280 chuang a awm mek a, ni tin hla hi dah belh zel a ni bawk.

Darbu CEO Lalrinnunga chuan, "Mizo zaimite leh rimawi a eizawngte tan tuna kan kalphung awmsa tibuai si lo hian kawng dang a la awm theih hi kan ring tlat a, chu chu zaninah kan dinchhuahpui ta a ni."

"He app hi Mizo mipuite, zaimite leh rimawi a eizawngte tan a hmasawnna bung thar a nih ngei kan beisei," tiin tlangzarhnaah a sawi.

Darbu app siam chhan
Darbu app-in a kalpui tur zinga hmasa ber chu Mizo mipuite'n Mizo hla kimchang thei ang bera an ngaihthlak theihna tur; hla hlui leh album hluite mumal taka dahkhawmna tura duan a ni.

Mizo rimawi eizawnna atana hmangten hlawkna ṭha zawk an hmuh theih phahna tura duan a ni a, rimawi khawvela eizawnna tlak thiamna nei, kal ngaihna hre si lote tana kawng thar a nih beisei a din a ni bawk.

A features chu...
Darbu application-ah hian thil chi hrang hrang a awm dawn a, mahse langsar pathum a awm. Chungte chu Darbu Library, Darbu Exclusive Release leh Darbu Store te an ni.

Darbu library hi ‘streaming platform’ a ni dawn a. Mizoten kan hriat lar - Spotify, YouTube Music te ang tho niin hetah hian Mizo hla tam thei ang ber mipui tan a thlawna ngaihthlak theihin a awm dawn. Heng hlate hi phalna nei a dah thlap an ni.

Darbu Exclusive Release-ah hian zaimite'n album thar an release a nih chuan Darbu App-ah hian an zuar ang a, he app-ah hian a lei theih ang. Darbu a release hla chu hmun dangah ngaihthlak tur a awm dawn loa, copy chhawn theih a ni dawn lo. Hei vang hian album siamtu hnenah hlawkna a kal dawn. Hemi aṭanga sum lut hi artist-ten 90% an chang a, Darbu-in 10% an chang ve ang.

Darbu Store-ah hian artist-ten an kutchhuak emaw bungrua eng ang chi pawh Darbu App katlangin an zuar thei ang. Anmahniin merchandise nei tura hma an la thei lo a nih pawhin an duhdan anga design puiin, artist-te tana hlawk tur si, a hranpa a an buaipui ngai si lo in Darbu hian a zawrhsak dawn bawk.

International shipping partner an neih bawk avangin khawi hmun aṭang pawhin a lei theih dawn.